كيف بتتسوّق أونلاين بأمان؟

بين عجقات السير القويّة والمولات يلّي عم بتعجّ بالنّاس، وبين الأسعار الخياليّة والـ TVA وغيرها من العراقيل، صار التسوّق أونلاين بديل أساسي بحياتنا. ومش بس بوفّر علينا الوقت كمان بقدّملنا خيارات أسهل وأريح.

مين ما بحبّ يعمل شوبينغ أونلاين؟ فيك تشتري شو ما بدّك إنت ومسترخي بالبيت ومنّك مضطر لا تروح عند الكوافير قبل ما تنزل على السوق ولا تلبس أجمل شي عندك ولا حتّى تعذّب حالك. وأكتر من هيك، فيك تتمتّع بعروضات وخصومات مميّزة.

بس كلّنا منعرف إنّو الدفع أونلاين مخاطرة بحدّ ذاتها لأن ممكن يكون الموقع مشبوه، لهيك رح نقدّملك نصايح بتساعدك تتسوّق بأمان على الإنترنت.

نصايح لتتسوّق بأمان على الإنترنت:

1 - تسوّق من مواقع آمنة:
كيف بتعرف إذا الموقع آمن؟ المواقع الآمنة بتستخدم تقنيّة التشفير لنقل المعلومات من جهاز الكمبيوتر الخاصّ فيك لجهاز الكمبيوتر الخاصّ بالتاجر على الإنترنت. التشفير بمحّي المعلومات يلّي استخدمها متل رقم بطاقتك الائتمانية ليمنع أيّ محاولة قرصنة خلال نقلها. ولتعرف إذا الموقع آمن في طريقتين:

 - أوّلاً، تأكّد إذا كان مبيّن الحرف s بعنوان الموقع الإلكتروني على الشكل التالي //:https لأنّ هيدا دليل على إنّو الموقع آمن، بس انتبه أوقات ما ببيّن إلّا بعد ما تنتقل لصفحة الطلب على الموقع.

- تانياً، لازم تشوف القفل مقفّل بخانة العنوان على شاشتك، لأن إذا كان القفل مفتوح بكون الموقع مش آمن.

2 - تحرّى عن الموقع قبل ما تتسوّق

لازم تتسوّق من مواقع لشركات بتعرفها وإذا ما بتعرفها، لازم تتحرّى عنّها قبل ما تشتري أيّ من منتاجاتها. وإذا قرّرت تتسوّق من شركة مش معروفة، اطلب بالأوّل غرض ما يكون غالي لتعرف إذا الشركة موثوق منّها. وفيك تتأكّد إذا إنت بالموقع الرسمي للشركة عبر شريط العنوان URL‪/address bar.

ولازم تعرف إنّو الشركات الموثوق فيا بتعرض على صفحتها الإلكترونيّة عنوانها أو بالقليلة رقم تلفونها للاتصال بخدمة الزباين أو إجراء طلبيّة. اتصل على الرقم الموجود واستفسر عن كلّ شي لتتأكّد إذا الموقع موثوق. وحتّى لو اتّصلت بعد الدوام، كتير من الشركات عندها "خدمة الإجابة المباشرة" لما تخسر ولا أي طلبيّة. كمان استفسر عن سياسة ترجيع المشتريات والشكاوى.

ومن الضروري تتطلع على صفحة الدفع التابعة للشركة لتشوف شهادة التحقّق من أهمّ شركات البطاقات متل فيزا أو ماستركارد. أكتريّة الشركات المعروفة هيّ أعضاء ببرنامج ختم الموافقة يعني عندها ختم موافقة من سلطات معروفة منها Verisign أو TRUSTe بحسب الصورة التالية.

 3 – اطّلع على سياسات الخصوصيّة والأمن لموقع الإنترنت

كلّ موقع معروف على الإنترنت بيعرض معلومات مفصّلة عن أيّ طلبيّة من خلال القسم الخاصّ بـ "سياسة الخصوصيّة". لهيك بتقدر تعرف إذا الموقع عندو نيّة يتبادل المعلومات الخاصّة فيك مع طرف أو شركة تالتة تابعة إلو. هل بيطلب من هالشركات الامتناع عن التسويق لعملائها؟ إذا كان الجواب لأ، توقّع يوصلك على بريدك الإلكتروني "سبام" (رسالة غير مرغوب فيا) أو حتّى استدراجك عبر البريد أو التلفون من قبل هالشركات.

وفيك تعرف كمان شو نوع المعلومات يلّي عم يطلبها موقع الإنترنت، وكيف بيتبادلها أو ما بيتبادلها مع غير أطراف. وبأغلبيّة الأوقات بتلاقي المعلومات عن أمن البيانات لموقع التاجر على الإنترنت بالقسم الخاصّ بسياسة الخصوصيّة، أو ممكن تكون موجودة بقسم منفصل لسياسة الأمن.

4 – شو أكتر طريقة آمنة للدفع على الإنترنت

 أكتر طريقة آمنة للدفع على الإنترنت هيّ باستخدام البطاقات الائتمانيّة. لأن بحال صار في أي خطأ، بتكون محمي بموجب عدّة تشريعات وسياسات. وكمان بحقّلك تناقش الرسوم على بطاقتك الائتمانيّة. وبس يصير في تأكيد على استخدام بطاقتك من دون إذن منّك، يمكن ينطلب منّك تدفع مبلغ صغير أو ما تدفع أي شي بحسب قيمة المبلغ وعمليّة الغشّ والاحتيال.

لازم تتأكّد إنّو بطاقتك المصرفيّة هي ائتمانيّة ومش بطاقة سحب آلي، ولا بطاقة موصولة بحسابك الخاصّ ولا شيكات. لأن البطاقات الموصولة بحسابك متلها متل الشيكات بتعرّض حسابك المصرفي لعمليّات الغش والاحتيال. وممكن حساب الشيكات ينمحي بدقيقة. أمّا بطاقات السحب الآلي وبطاقات حساباتك فهي مش محميّة متل البطاقات الائتمانيّة. لهيك لازم دايماً تفصل البطاقات يلّي بتستخدمها للانترنت عن بطاقات السحب الآلي وبطاقات حساباتك وتستعمل بطاقات محدودة بمبلغ صغير بس تتسوّق عن الإنترنت لتقلّل من خساير عمليّات الاحتيال.

إذا تسوّقت عن الإنترنت بواسطة الشيكات بتكون عم بتعرّض حسابك للاحتيال المصرفي. كمان تحويل الشيكات أو المصاري منّا طريقة آمنة في حال واجهت أي مشاكل بتتعلّق بطلبيتك.

وبس بدّك تتسوّق عن الإنترنت ما لازم أبداً تحوّل مصاري لتدفع لأن في احتمال تكون عم تحوّلن لشخص محتال. والمحتالين بيطلبوا منّك تدفع عن طريق خدمة تحويل المصاري مثل Western Union أو MoneyGram ليستلموا المصاري بسرعة بلا ما يتركوا أي أثر. وتذكّروا إنّو المواقع الشرعيّة والموثوقة ما بتطلب عادة من المتسوّقين يدفعوا بهالطريقة. لهيك لازم تحويل المصاري يكون بس لأشخاص بتعرفن منيح.

5 – خلّي كلمة المرور Password سريّة

كتير من مواقع التسوّق على الإنترنت بتطلب تسجيل الدخول قبل ما تقوم بأي طلبيّة أو تتطّلع عليها. وعادة بتطلب من المتسوّق تسجيل اسم المستخدم وكلمة المرور.

ما تكشف كلمة السرّ الخاصّة فيك لأي شخص. وبس تختار كلمة المرور، ما تستعمل معلومات معروفة متل تاريخ ميلادك. كمان ما تستعمل نفس كلمة السرّ لغير مواقع، وخاصّة المواقع المرتبطة بمعلومات حسّاسة. وأفضل كلمة سرّ هيّ المألّفة من حروف وأرقام وتكون 9 على الأقلّ.

6 – احتفظ دايماً بنسخة عن طلبّياتك

من بعد ما تقوم بالطلبيّة على الإنترنت، لازم توصلك صفحة مفصّلة لتأكيدها بتضمّن قيمة الطلبيّة، معلومات عن العميل، معلومات عن المنتج، ورقم التأكيد.

لهيك لازم تقوم بطباعة أو حفظ نسخة من صفحات الإنترنت يلّي بتفصّل طلبيتك، وكمان الصفحة يلّي بتبيّن اسم الشركة، عنوان البريد، رقم التلفون، والأحكام القانونيّة، ومنّا سياسة ترجيع المنتج. احتفظ فيها بسجلّاتك على الأقلّ بالفترة يلّي بتغطّيها سياسة الترجيع/ الكفالة.

وكمان رح توصلك رسالة تأكيد بالبريد الإلكتروني من قبل التاجر على الإنترنت. تأكّد من حفظ و/ أو طباعة الرسالة أو أي مراسلات إلكترونيّة مع الشركة.

7 – انتبه للوقائع الخاصّة بالشحن

بموجب القانون، بتقوم الشركة بشحن الطلبيّة بحسب الوقت المعلن عنّو. بس إذا ما كانت محددة فترة، لازم تشحن الطلبيّة خلال 30 يوم أو تعطيك "خيار الإشعار" يلّي بيسمحلك تلغي الطلبيّة وتستلم ردّ مباشر، أو فيك توافق على التأخير.

الأسئلة الرئيسيّة يلّي لازم تستفسر عنّا:

هل بخبرك الموقع إذا في قيود جغرافيّة أو غيرها للتسليم؟

هل عندك خيارات للشحن؟

مين بيدفع تكاليف الشحن؟

شو بقول الموقع عن التأمين على الشحن؟

شو هيّ رسوم الشحن والتوصيل، وهل المبلغ معقول؟

7 – ما تكون ضحيّة رسائل الاحتيال الإلكتروني

اسمن سارقي الهويّة وهنّي أشخاص مختصّين بعمليّات الغش والاحتيال عبر أعداد كبيرة من الرسايل الإلكترونيّة يلّي بيبعتوها لمستخدمي الإنترنت ليطلبوا منّن تحديث معلومات حسابن المصرفي، وبطاقاتن الائتمانيّة، وخدمة الدفع عبر الإنترنت، أو مواقع التسوّق المعروفة. معقول يكون مضمون الرسالة إنّو معلومات حسابك انتهت صلاحيّتها، انخرقت أو التغت وإنّك بحاجة ترجع تزوّد الشركة فيها.

بعض الرسايل الإلكترونيّة يلّي بتكون تابعة لعمليّات "الاحتيال الإلكتروني" بتضمّن بأغلبيّة الأوقات رابط لصفحات إنترنت بتوحي إنّها شرعيّة. وبترجع بتطلب من المتسوّق بواسطة الرسايل الإلكترونيّة تحميل وتقديم استمارة إلكترونيّة.

تذكّر دايماً إنّو الشركات الشرعيّة ما بتسأل عن معلومات حسّاسة عبر البريد الإلكتروني. لهيك ما تردّ على أي طلب للحصول على معلومات ماليّة بواسطة الرسايل الإلكترونيّة ولا تضغط على أي رابط بكون مرفق بالرسالة الإلكترونيّة المشبوهة، ونحنا مندعي دايماً محلات التجزئة أو المؤسّسات الماليّة ليتحقّقوا من وضع حسابك قبل التصريح عن أي معلومات.

باختصار

ما في شكّ إنّو التسوّق على الإنترنت أسهل وأريح من التسوّق التقليدي ويمكن يكون تجربة خطرة إذا ما عرفت كيف تحمي حالك من عمليّات الغش والاحتيال الإلكتروني. فإذا كنت عم تتسوّق لنفسك، أو عم تشتري هديّة لحدا، تذكّر النصايح يلّي قدّمنالك ياها واستمتع بتجربة التسوّق على الإنترنت!